وقّف,, وناظرني,, واسمع كلامي

لي ساعةٍ في ها المكان اتحرّاك

سلّم وشف سر الزعل في سلامي

وقلي وش اسباب الخطا لا عدمناك

ما اصدق انك راضيٍ باتهامي

وساكت على من يزرع الشك بحماك

واللي جرحني منك,, واقلق منامي

وخلاني بحيره صدودك وجفواك

ولقياك الى هالحين غاية مرامي

وشلون ابيعك؟ قول من قال بعناك

ومحال انزّل للعواذل مقامي

قد حاولوا تكدير حبي لطرياك

يحق لي ازعل وابين ملامي

ولولاك نور العين ماجيت لرضاك

ما اصدق انك ما فهمت اهتمامي

والا ارتباكي كل ما تقرب خطاك

ولا من سمعت اسمك تضيع الاسامي

غصبٍ على يفز قلبي للقياك

ما اقدر اداري لهفتي في سلامي

وش فرحتي لمن تبسّم محياك

وانت بصراحة تستحق احترامي

دام الوفا يا صاحبي من مزاياك