طرق على خشم القصايد تجي لك

كل الجهات تشر لها صوب ميناك

شموع قافي ما روت موج ليلك

وشمس الضحى يشرب سناها محياك

حسنك فضح كل الحسن في سبيلك

مثل الزهر يفضح تجاعيد الاشواك

اسرت نسناس الهوى في جديلك

وقيدت عود الريف في مشية خطاك

مثل البدر والا البدر هو مثيلك

اكيد انه لا بغى النور ينخاك

ظما سنيني يقتله سلسبيلك

وروح الشتاء تدفى على جال يمناك

رعاد حزني ينتهي في هديلك

ويظهر ربيع الوقت لامر طرياك

ان جيت تضحك دمعتي من مخيلك

وان غبت اسامرك بعتب واتحراك

لا لا تغيب وما بغيته يجي لك

لو قلت هات العمر لاقول لك جاك

سيف المشاعر والفكر يعتزي لك

والقاف وراعي القاف يا زين يفداك