الحقيقة أن الأستاذ الحميدي ذكر لي بأن هناك فاكسات وصلت له مفادها بأن بعض الشعراء الذين انتقدتهم قالوا بأن القصائد التي تم انتقادها ليست لهم,, والحقيقة بأني لست مسؤولا عن هذا,, ومن هؤلاء مغلي العرقين الذي نفى بأن تكون القصيدة له,,
اقول لمغلي العرقين بالنسبة للقصيدة السابقة ونفيك بأنها لك لا يهم المهم الخطأ,, والآن لنرى العثرات الجديدة ومنها:

عام الأول يوم لا قلت الحقيني جاوبتني أما قالت زين وإلا قالت شويه شويه

مغلي العرقين
كيف مثل هالكلام يحسب على شاعر في مجتمع محافظ وكيف هذا الكلام ,, وكيف نشر وبصفحة كاملة وما المقصود بهذا؟!.
,,,,,,,,.
كشفت المستخبي والوعود اللي تسرمدها
ناصر القحطاني
حنا نكتب شعر شعبي أما مستخبي هذي كثر منها ولو انك دققت في الشطر الأول كان يكفي,, يا ناصر راجع نفسك والله يرحم ولد عمك حمد هادي اللي يقول:

اشهد ان من يفعل الجود باللي ما يجود مثل من حجج على غاربه ذباح ابوه

واظهر وبان يا مستخبي!!

أنا أشهد أنك بالمشاعر تفننت تخطي وتزعل وحنا سموحي

ذكرى الشعلان
الله الله,, صح لسانك,, يا سهل الشعر سهلاه,, تخطي وتزعل وحنا سموحي والله الوزن ابداع ما فيه أي كسر يا أخت ذكرى بالله كيف طلع معك موزون عجزت اعرف وزنه المفروض تقولين يا بخوت اسف قصدي يا ذكرى:
تخطي وتزعل بس قلبي سموحي ولو ان المعنى لك عليه مشاريه بس شيء يواجه على الأقل,, شكرا.

الشارع اللي يشتكي من نزيفه مواكب الزحمه معه هددتني

نواف الردعي
لحظة,, لحظة,, وش هالزحمة,, حلو يا نواف هالبيت بس ترى أكثر الناس ما يعرفون معناه إلا أنا,, أنت تقصد بدال نزيفه رصيفه والشطر الثاني مواكب الزحمة عليه عسرتني,, صح لأن الرصيف ضيق والزحمة والناس قامت ترقا الأرصفة علشان تنحاش من الزحمة وحجروك,, أقول والله شيء ينترقع وشيء ما ينترقع والله قابلني اذا كاني فاهم والا غيري فاهم والا أنت فاهم وش تقول,, وسلم لي على المعاني الجزله.

تصبح على خير ياللي تسأل اشلوني وسلم على طاري الوفا وبلغه بفراقي

صدى الصمت
,, تصبحين على خير,, بس الشطر الثاني بالله يا صدى وش وزنه,, أنا عارف انه موزون وما فيه أي كسر ومعناه جميل طاري الوفا بس أنا وأنا أخوك ما أفهم بالشعر وودي اكتب مثل هالبيت بس أقول يا صدى الصمت لو قلتي:

تصبح على خير ياللي تسأل اشلوني على الوفا سلّم وبلغه بفراقي

كان قلنا حلو ما في الوزن أي اصابة,, إلا على طاري الوفا وش يعني صدى الصمت,, يمكن سكوت.
اعزائي الشعراء,, ترى والله الشعر كايد وصعب ماهو خرابيط والشعر كما قال الشاعر:

الشعر إن لم يكن ذكرى وعاطفة او حكمة فهو تقطيع وأوزان

وخلوا عنكم هالكلام اللي تنشرونه وتسمونه شعر وتسمون نفسكم شعراء
زبن بن عمير