يا كم مرة شفت بعيون الاطفال

حلو الأماني غرها قاسي الوقت

بيض الليالي واعدتهم بالآمال

قالت تراني في وعدهم توهقت

أنا أحسب ان الحال يبقى كما الحال

خطاي من دور الفلك ما تحققت

ضحكت احسب الناس في فيّ وظلال

مليت بالأوهام عيني وصدقت

ارسلت بالبشرى ثلاثين مرسال

غرّبت بالاخبار فيها وشرقت

ورقيت بالعالي على قمة جبال

حتى على غرات بقعاء توايقت

وشفت الحقيقة مدبره مالها اقبال

واودعتها وبكف في كف صفقت

جمعت ذكراها ورق وآخر ريال

وشبيت نار من الغضب فيه وأحرقت

الصبر زين وما أصعب الصبر ليا طال

في مثل سلك العنكبوته تعلقت

ثلثين راحت من شقا العمر رحّال

لا منيةٍ جتني ولا راحةٍ ذقت

والله لولا اصحابي اللي على البال

اللي يسر البال فيهم ليا ضقت

اصحابي اللي خير من روس الاموال

في عرفهم من حمد ربي توفقت

والرفقه اللي مالها نفع ووصال

بينك وبين اللي من الناس رافقت

لا تعتبرها غير هيكل وتمثال

إن بعت جملة بيع وإن كان فرقت