ذكراك في قلبي وروياك بالعين

وغلاك عندي كل يوم يزيدي

ياالساطي القطاع بالعسر واللين

يااللي لعصمان الشوارب عنيدي

غاذيك لايامٍ بها الربع ربعين

لنطح العدو وان جا نهارٍ يكيدي

ابيك طيرٍ ترتفع بالجناحين

حرٍ لجزلات المعاني تصيدي

ابيك لي وإلى غدا الجمع جمعين

لكسب المعالي ما تجيب الزهيدي

أبيك وان ثاروا هل الدين بالدين

تصير مفراص الحديد الحديدي

وسلم على خالد زبون المخلين

اخوك عزك بالنهار الشديدي

اخوك بالشدات طلق الذراعين

اخوك كساب الثنا والحميدي