نشرنا في العدد السابق في ملحق تراث الجزيرة لغزاً كتبه الشاعر ضمن السناني يقول فيه:

ابنشد أهل الذود والعارفيني عن شاهد يشهد وللحق قايل ابكم وصادق من قديم السنيني وشهادته ترضي جميع القبايل وقد توالت الحلول التالية: بسم الله الرحمن والله يعيني والله يوفق من يحب الجمايل الوسم حل اللغز علم يقيني بين القبايل واضح للدلايل

يا ضمن جاك العلم علم يقيني وامسك كلامي لا تدور بدايل لغزك عرفته يالفهيم الذهيني لغزك من سلوم الجدود الأوايل باقي على طول المدى والسنيني وسم يصير لصاحب البل دلايل

ياللي كتبت اللغز لغزك سميني اللغز وسم محبسات الشمايل اللغز وسم مهجرعات الحنيني كلٍ على وسمه خط الدلايل

نبي نحل اللغز والله يعيني يوم السناني بينه بالمثايل هذا تراه الوسم يالطيبيني حكم جرى ترضاه كل الحمايل

يا الله واني في رجاك استعيني ياللي تحل عقود كل المسائل الوسم للاعيان لازم يبيني إن ضاعت الناقة عليها دلائل

يا بن السناني قلت قولٍ ثميني ونظمت في قولك رفيع المثايل أطربتني في كل سطر حسيني حتى تورتلي حلول ودلايل من أقصى الشمال ارسلت للغانميني ارجي عساي لرمعة اللغز طايل الوسم حل اللغز بالعارفيني وشهادته ترضي جميع القبايل

عبر الجزيرة شفت لغزن ثميني والحل واضح ما يبله دلايل حله نجيده في جوانب يقيني ذاك الوسم مع شاهدٍ للقبايل

سر يا قلم واكتب لنا كلمتيني يوم استوى للبال رد المثايل لغز السناني واضحٍ للفطيني واللي رعى البل مع دروب المخايل شاهد لراع الذود لازم يبيني وسم المطايا هو خيار الدلايل

حل اللغز يا ورثة الطيبيني الوسم مرسوم على عنق حايل وأيضاً على الرخلات رسمه يبيني والمذهب الدوار بوصفه يسايل

يا من نشرت اللغز للمسلميني شكرا لمن يحفظ تراث الحمايل واللغز واضح والحقيقة تبيني الوسم حله من كبار الدلايل

يقول من جاب القلم باليميني بمسطر القرطاس صغت المثايل ونبي نحل اللغز يا العارفيني لغز السناني ما بها قول قايل والحل واضح والشواهد تبيني شواهد وسوم القبايل دلايل

ياهل الجزيرة جعلكم سالميني واللي كتب لغز العدد بالكمايل ينشد اهل الذود والعارفيني عن شاهد يشهد وللحق قايل اللي إن ضاعت ناقتي من يديني عنها نشدت وقلت هذي الدلايل (وسمي) عليها بليل أظلم يبيني من شافها يعط الخبر بالعجايل

يا ضمن نضمن حل لغز الفطيني مع الرجال اللي تحب الأصايل أشعيل قفاء بالوسم له حنيني يبينه عن كل مخطي عايل

حي التراث وربعنا الطيبيني واللي كتب عن شاهد الذود سايل وسم إبنار إيسار وإلا يميني بوروكها وأرقابها به دلايل سنين مضت رعي وعزيب وقطيني طرش إختلط وإعدود شربه قلايل واليوم قلت حاجته يافطيني وايت تبعها والمعاميل شايل

طاب الكلام وحن قلبي حنيني لشوف الربيع وقول زين المثايل كتبت حل اللغز أنا في يميني (وسم) البكار الطيبات الاصايل

يا ضمن لغزك واضحٍ للفطيني واللي يعرفون أمهات الشمايل الوسم فوق أمهجرعات الحنيني يشهد لهلها من عصور الأوايل

(الوسم) لأهل الذود يالعارفيني يبقى لهم شاهد على كل عايل علامةٍ توضع على أم الحنيني اللي لها في سالف الوقت سايل

إنشد يجيبك يالسناني فطيني موثق علمه شهود ودلايل الوسم شاهد من شهود اليقيني أحد جلي معبسات الشمايل

يا ناشد أهل الذود والفاهميني خذ حلها مني ابنظم المثايل الوسم فيه أهل الإبل معتنيني اثبات ملكية وللشك زايل ويصير عن كثر المغالط ضميني يحمي حلال الناس من كل عايل

أحبها لونها ما تبيني اشباهها بين الجرايد قلايل بنهاية الأسبوع جت صفحتيني بجهودكم ياهل الوفا والجمايل وفقكم الخلاق دنيا وديني اخلاصكم مافيه كذب أو تحايل الوسم فا السودان فا المطر قيني متباريات مثل وصف الجوايل

حي الله اللي جاب للغز ثميني مظبطه با الحيل نسل الحمايل للغز على معناه وسم سميني محكم على ما قال موسم هوايل ماهوب تايواني ولا هوب صيني مصانعه بين المدينة وحايل وسمه تبين من يسار أو يميني وسم الوفا يعرف بليا دلايل

ضمن ضمن له لغز محكم ثميني وصاغه على بيتين واف الخصايل يبي ردود اصحابنا الغانميني زحول الرجال اللي تحب الجمايل ذكرني الماضي وعصر القطيني يوم الجهامة والخيول الاصايل (الوسم) يحفظ مرزمات الحنيني ومن ضيع ذهيبه يجيب الدلايل

أنشد وحنا لك ترى والميني نعطيك حله قبل قاصر وطايل الوسم طبع رجالنا الأوليني علامة ترضي جميع القبايل

بشارك أهل العرف والطيبيني في لغز كساب الثنا والجمايل ضمن عزيز النفس ذرب اليميني اللي ركب عوص النضا والأصايل وحط الوسم برجولهن واليديني حتى الوسم يعرف ويبقى دلايل

يا مرحباً باللغز والكاتبيني إعداد ما هلت حقوق المخايل اللغز معروف وحله يقيني الوسم شاهد عن جميع الدلايل

يا مرحبا ياللي كلامك حسيني ياللي كلامك من حسين المثايل هذا الوسم قدره على البل ثميني يفرق حلالك من حلال الحمايل

الحل (وسمٍ) فوق هجن الغصيني وسمٍ شهير للركاب الأصايل والشاهد التمييز يالفاهميني يفصل ما بين أذواد كل العوايل