ياناس شب الشيب فالراس وانداش

وقلبي كبير الهم والشين خشّه

صارت لي الأحزان وهمومي فراش

والدمع ما أقدر بالمناديل أمشّه

والحال حال وحالتي فالهوى ماش

فرقا الولايف,, خلّت الحال هشّه

اللي شريته,, باعني بيع ببلاش

وزرع الغلا بالوصل ما عاد رشّه

اسمه نقشته وسط قلبي بمنقاش

عامين يسكن في خفوقي بجشّه

لكن رمى قلبي بطلقات رشاش

وزرع الغلا جاه بمحشّه وحشّه

وعمر الغلا دايم على البعد ماعاش

البعد يعدم كل حب يدشّه

وحبٍ على وضح النقا,, مابه غشاش

في ذمتي مافيه داعي نخشّه