سود الله وجهك يا النصيب الردي
ما دريت ان ظلمك للحبيبة حرام
والله لو كنت يا الحظ التعيس أجودي
كان تفرش لنور العين ريش النعام
دمعها اللي تناثر فوق خد ندي
يكتب أصدق تعابير العتب والملام
أشتكت لي وانا عزاه وش في يدي
عجز حتى لساني يعتذر بالكلام
وجت همومي تبارى كلها وتعدي
وارداتٍ على القلب الشقاوي حيام
واعذاب الذي حده زمانه حدي
وشاف دمع التعاسة في عيون الكرام
باشة الغيد عنها ما ذخرت اجهدي
دامني حي ما ودي غناتي تضام
حتى لو راح عمري في هواها فدي
تستحق الغلا والتضحية والغرام
ليتني طلت نجم اسهيل والّا الجدي
لاجل احطه على صدر الوفيه وسام
وليت وقتٍ جمعنا بالسعادة مدي
آه يا وقتنا الماضي عليك السلام
ينتهي العمر واحزان الشقي تبتدي
لو ضحك ساعةٍ يبكي ثلاثين عام
