ان مرّك الليل جمع له هواجيسك
وان ملّك الليل دور صبحك التايه
مادام ودتك لحدد الظما عيسك
بعض النهايات لحظة حسم وبدايه
من يخذلك ما يفكر كيف احاسيسك
دام الوسيلة تبررها له الغايه!
تنسى ولكن صدماتك نواقيسك
واقسى التجارب مريره، لكن مرايه!
الوهم كذاب لو شكّل تضاريسك
والشمس ميلادها لاوهامك نهايه
من علّم البوح في لهفة قراطيسك
من سلم النزف في وجدانك الرايه؟
تمدد الحزن في داخل قواميسك
لو ما كتبته كتبك بعشق وهوايه
يمرّك الليل ما تدري فوانيسك
والصبح لو يوعدك عن عالمك تايه!
