عن جيدها جيت أسولف والنحر والعيون
والسلهمه والحور ومعكرش اهدابها
عنقا كسى عودها مجدول خضر فتون
أسبل سواد غشاني من تلوابها
عمهوجة صدرها زامي,, وكن المتون
من طولها تستخيل المزن لترابها
ينسب لها الخيزران ,, وغطرفات الغصون
والريم يشديلها,, والعشق لحبابها
تذبح بجمر الشفايا والمبيسم حنون
من ضحكة يكفي ان الغي هلابها
في غطرستها دلال يستثير السكون
ولو تنهصر قامت الدنيا على حسابها
غنى لها الملح والموت الحمر والجنون
والتيه,, وطلة محيا الوجه غنابها
هي عسوجيه وباشة غيد مابه ضنون
حورية للغلا وحسن البها جابها
تقطف عناقيد شعر ما خذلته الوزون
تغري طواريق بوح مانوى اعتابها
كل المشاعر لها تقفى سواة الضعون
وان اقبلت نوخت بالخافق اركابها
تكونت في شراييني قبل ماتكون
وشلون؟ مادري!! غموضي يمكن اداربها
بفراقها ماقوى النسيان مرة يخون
لان بغيابها لوعة شقا غيابها
فدى دروب الهجاد اللي تزيد الطعون
وسنين اقسى حياة طارت أسرابها
تمون يا عذب قصيدي,, والله انك تمون
لك رأية من حنيني فوق مرقابها
وعسى الليالي,, ونشواتي بسود العيون
تدمع خطأ زلة ارماح من اهدابها
