الأمر أمر الله ولابد نرضاه
مافي يد المخلوق حل وحيله
هذا قضى ربه ولو مابغيناه
والموت سنة مالها من بديله
اسمه بوسط قلوبنا قد حفرناه
ثلاثين عام وماعرفنا مثيله
وهب حياته للوطن من عرفناه
اعمال فيصل من عرفها تخيله
خلف لنا أمجاد الرياضه لذكراه
حقق لنا أحلام لنا مستحيله
قاد المسيرة ماتوانا بممشاه
صرنا مع العالم قبيل وقبيله
مامات فيصل في ضماير أحباه
لو غاب شخص الرمز فعله بقي له
واليوم في سلطان شخصه رجيناه
نعم الخلف نسل الجدود الأصيلة
في مدرسة فيصل تعلم سجاياه
ومن الفهد حب الوطن والفضيلة
ومامات من خلف وريث بدنياه
نواف وخالد هم ذخر كل ميله
يجبر عزاهم ربه اللي تولاه
ماغيره أحد للبشر ينشكي له
رحيل ابونواف محدٍتمناه
راعي الإيادي البيض يمناه خيله
وشلون نسلى عنه وشلون ننساه
ابو اليتامى والصفات النبيلة
كم واحد جاله من الظيم واعطاه
وكم معسر للحق واخلى سبيله
وكم عاري من جور وقته وغطاه
ليمن تبسم كل همك يزيله
داني وقاصي الدار لاضاق ينصاه
راعي المواقف والعلوم الجميله
وكم من مريض في دياره وناداه
ومن حر ماله يستجيب ويعيله
يسراه ماتدري عن افعال يمناه
لاوالله اللي مايمد الهزيله
محبوب عند الناس من يوم مبداه
مواقفه والطيب ماهي قليله
ياليت يومه ياالفهد مالحقناه
ولاسمعنا هاالخبر من وسيله
الصبر يامولاي والله بكيناه
وشعبك حزين والمدامع هميله
نبكيه وتبكيه العروبه وتنعاه
من كان فيصل شمعته طال ليله
لو ينفدا بالروح فيصل فديناه
ولو البكا ينفع سبقنا رحيله
الله يغفر له ويجزاه حسناه
ويجبر عزاكم واسرته مع خليله
ياالله عساه بجنة الخلد مثواه
ياالله عسى روحه بروض ظليله
حقه علينا نكمل الدرب بخطاه
وبكل صرح شيده ندعي له
