نشرنا في الأسبوع الماضي لغزا كتبه الشاعر خلف الأسيد الشراري يقول فيه

ويش رجل بوقت اللين والشده ثابتٍ في مكانه بايسر العالي حوله اقوام مثله ما تجي قده بالوفا مرضي الأول مع التالي

وقد جاءت الحلول الصحيحة التالية:

يابن الاسيد اللغز نبعث لكم رده عبر الجزيرة يافتى الجود مرسالي لغزك عجيب ويجذب النفس من عده يامعرب الجدين والعم والخالي ياراه من بالشام واللي سكن جده لا بعد عن الانوار في موقعٍ خالي ذاك الجدي تهدف مشاهير في حده كوكب دليله ياخلف كل من عالي

عايد البوجان الشراري
***

اللغز واضح والنعائم توده والجدي ثابت واتجاهه شمالي لغز الغهيم وعارفين مرده يازين حله اصفالك مجالي

سالم سليمان الرشدان العنزي
الرياض
***

يابن الشراري يأتيك احلول مرتده من كل ديرة يجي للغز حلالي وأعلم ترى (الجدي) في كبد السما حده كم واحد يهتدي به فالخلاء الخالي وأعلم ترى له فوايد ما لها عده ولا من قرينا علوم الفلك نهتالي

محمد المويعزي الحربي
بريدة
******

لابن الأسيد الحل لازم نرده محملٍ بالشوق لاهل الشمالي والجدي حل اللغز واللغز حده نجمٍ مكانه ما تغير ومالي

تركي قياض الشراري
طبرجل الجوف
***

اللغز ما عنه عذر أيضا ولا صده خص الى قاله اللي تعرف او غالي خلف أسيد الشعر ذخر له ايعده والى بغيته لقيته نعم رجاي نجم الشمال الجدي دليله ابخده للتايه الساري إبليلٍ بال إخيالي

فهد بن عقيل الطويان
بريدة
***

يامرحبا من ضميرٍ جاهزٍ رده يعرف دروب الحبايب والله الوالي الحل نجم (الجدي) لو طالت المده ما يختلف منزله للناس دلالي ياطير بالله يم تراثنا وده صفحة تراث الجزيرة غاية آمالي صفحة بها شعر نشكر كل من عده صفحة تراث الجزيرة مهرها غالي

سعد سرور الكرشمي
الدوادمي
***

ما قريت الجرايد صار لي مدة شهر ولا مرت الراحة على بالي الناس بالصيف بالدمام وابجده بفراح وانا الهموم تجيني لحالي تنشد يابومزهر البارح عن الصده والعذر كبر الجبل ما هوب ينشالي والعلم ياللي تحل اللغز وتعده مثل الجدي ثابت ما هوب ينزالي

محمد بن عبدالكريم الغزي
الزلفي

حتى العنب دمعته طاحت على خده من يوم غنى الوفا للبعد موالي احترت في مزح ابن هزاع من جدة راع الوفا ما علي من هرج عذالي مثل الجدي بالسماء ما نزاح عن حده واضح وله منزل ما هوب منزالي

الزلفاوي
الزلفي
***

يامرحبا بك عدد ما فات من مده واعداد ما ناحت الورقا على الجالي الجدي لغزك بثوب لا بس قده والظاهر انه صحيح ولا به جدالي

منصور محمد السيحاني
***

الشراري يفوح الطيب من سدّه والزّمان اثبت انه شاعر مثالي راعي الطيب لا يمكن نجي ضده والقلم نرفعه عن لوم الانذالي كوكب الجدي دايم ماسكٍ حده ثابتٍ في مكان بالسماء العالي

صالح سفر العمري
***

حييت ياراعي اللغز مع معده نعطيك حله كان صاب احتمالي ياسارين مع سهلتن مجرهده احذر تتيه وتقضب الدوخالي انظر النجم الجدي يلمع بخده له منزل جنب التعايم شمالي

دخيل فضي الشملان العنزي
الرياض
***

لي صديقٍ تغيب جايله مده يالله انك ترد اللي على بالي ياخلف كلمه واله الخبر وده قل ترى عقبكم كن البلد خالي (الجدي) بالشمال اشوف ما قده وايضا سهيل والمعن كما قالي

موسم بن سفر القثامي
الطائف
***

مرحبا بالشراري لغزنا عده ياهلا به عدد ما هل همالي لغزكم يالسنافي عندنا رده بالجزيرة يشوفه طيب الفال بالسماء مسكنه هو لازم حده يمتكم ياعزيز عندنا غالي الجدي في شماله عارض خده هو دليلك لاضعت بالخلا الخالي

راشد بن ناصر الشقيق
الأسياح
***

ياللي احباله بالوفاء دوم ممتده معذور قلبٍ دخلته حيل يالغالي شعرك خيال وصفكم ما نجي حده من استمع له هاله الدر واهتالي ولغزك ترى اليوم كل خاطب وده مثل الجدي في مكانه بالسماء عالي

محمد عبدالله العسكر الحنيني
البكيرية
***

يامرحبا باللغز واللي يعده ترحيبة الغالي الياشاف غالي وقم يانديبي حلنا اليوم وده وقله تراه الجدي وصفه خيالي

علي بن سمير العوفي
وزارة الصناعة والكهرباء الرياض
***

الله إنه يذكرك بالخير ياجده جيتها بالليل فيها وانسمح بالي حول شط البحر ما نطري الصده عندنا شدوا خلف مشهور الأمثالي لغزه اللي ذاع صيته وانتشر نده قلت أنا الجدي حله يبن الابطالي مع تحياتٍ تثنى قلتها عده صادق يعلم بها علام الاحوالي

عبدالله غازي العيد الحنيني
القصيم الضلفعه
***

لا تردى الفتى ما ينفعه جده ما يفيد الأبو والعم والخالي الفخر للذي بيده بنى مجده جدد اللي مضى بنجازه الحالي لو صروف الدهر تكالبت ضده راسي ما يتغير كل الاحوالي والجدي بالشمال ملازم حده ثابت في مكانه بالسماء العالي

مطلق بن الأسمر الشراري
الرياض
***

ياكاتب اللغز دوك الرد ثم وده وده تراث الجزيرة طبع طوالي اللغز نجم الجدي والوقت ما هده ثابت ويبقى مكانه يشعل اشعالي

ضويان الحسيني الحمادي
***

ياهلا مرحبا واللغز خذ رده ياكريم النبا للضيف مدهالي ستر لغزك تجلا وانكشف سره في تراث الجزيرة ما به اجدالي الجدي ياخلف ما نزال عن حده حوله نجوم تسبح بالسما العالي

فهد عبدالرحمن الجاسر
الأسياح