شب جمر الغرام وفاح طيب الخفوق

يوم ذابت ضلوعي فوق جمر الغرام

يجري الحب مثل الدم وسط العروق

ولا تمكّن سكن بين اللحم والعظام

خيّل العاشق العطشان تدنى البروق

كان مسقاه خله ما سقاه الغمام

هاضني داعي الاشواق اغني الطروق

والمحبة تعلمنا فنون الكلام

عودت شمسي اللي غيبت للشروق

والقمر زاح بيدينه ستار الظلام

السايب هنوق ذات طرفٍ سروق

يسترق من عيون العاشقين المنام

يشتهي ريقها السكر وتمر العذوق

ويشتهي خصرها ظبي الفلا والحزام

ضمةٍ من يديها للعليل الشفوق

تبري اللي بقلبه من جروح الهيام

شف ما لي لها في النفس كيفٍ وذوق

نور عيني لها في القلب قدر ومقام

الوفا طبع قلبي والوفي ما يبوق

والجفا من طبوع النذل وابن الحرام

في الحشا من لواهيب المحبة حروق

وين من يجعل النيران برد وسلام

يا سلامي على بنت هواها صدوق

دامها موفيتلي تستحق السلام