شفتك وغضيت النظر عنك خايف

ما ابيك تلمح نقطة الضعف فيني

مسكت نفسي غصب ياغلى الولايف

من كثر شوقي لك تراجف يديني

الشوق يرجف في الضلوع الرهايف

ما كنت اصدق فكرة انك تجيني

صمتي يداعب لهفتي في الشفايف

هو انت والا غيرك اللي يعيني

لا ما تجاهلتك يازين الوصايف

يا سلوتي عن كل نفس تبيني

دنيا بدونك ما عليها حسايف

شمعة زماني,, وانت قمراء سنيني

شفتك وغضيت النظر وانت شايف

الناس حولي,, نقطة الضعف عيني