هيه يا اللي نزلتي بالحشى وسط روض
جنب لوحة قديمة ما ظهر لونها
هيه يا هيه قولي للسوالف تخوض
في تفاصيل هاللوحه ومضمونها
هي تراها فريضة غير خمس الفروض
اسمعي قصة اللوحة ومجنونها
هي شواطي جميلة تمتلي ما تغوض
مير ياهيه بعض احيان يوذونها
هي سحابة عريضة بالبوارق تنوض
مردفين المساء والصبح يردونها
هي سفينة غرام ولا دخلها رضوض
البحر من وراها والفضاء دونها
هي بساتين عاشق عانده حظ نوض
بالشمال الشمالي شاب مفتونها
هي مداهيل خيل وسيف قاضي وحوض
ترتوي من هبوب الريح بردونها
هي قصيدة ولكن كل ابوها غموض
تستثير المشاعر يوم يقرونها
هي باقيا بقايا تستطيع النهوض
بين الانقاض لو ياهيه يغرونها
هي بعدلو تحوز الكاس بين العروض
قلت ياصعب فرقاها ويا هونها
هي وانا اللي بكل الحالتين امحضوض
لو تشوف القمر والشمس بعيونها
هيه يا هيه لا تغرين قلب الغيوض
الشفق غاب واللوحة على لونها
