قالوا الناس: هذي لوحة النور
قلت: والله ما هذي بلوحه
عينها بيت عز وكحلها سور
والمطر ريحها والصدر دوحه
والشعر سالفه والخصر مغرور
وآخر الغصن له جيه وروحه
قلبها عشب ابيض والحشا بور
زارعٍ في محياها ملوحه
حكيها صبحٍ اطلق روح عصفور
وصمتها كن به عذر وسموحه
لا تثنت يصف العشق طابور
ولا تمنت يمد الشوق روحه
سحرها العذب يفضح كل مستور
لو يحاول لنفسه مايبوحه
ونارها تسكن اقصى البرد وتثور
يوم تعطي دلال القلب فوحه
في خفوقي تلف هناك وتدور
من سواني هواه لبير نوحه
فدوة وعودها الحرمان والجور
والقلم لاغدى عطره جروحه
مرت الليل برق وسيلت نور
واغرقت ريشتي في غيم لوحه
