كل ما عفت الهوى وقلت انتهيت
وقفت لي بين حجاني مره
حظي اللي لازهمته وانتخيت
كشر بوجهي ولقاني ظهره
بين خفاقي وعقلي بعد هيت
وبين قلبي والشقى قدر شعره
إيه انا الرحال,, اقفيت ولفيت
دنيتي عندي مثل ظل شجره
شلتنا حملي الثقيل وما اشتكيت
وماحدٍ يشكي على الغير قهره
ما يطفي عبرتي دمعٍ بكيت
وما يشيل حمول دنياي عشره
لي خفوقٍ لانظرته قلت ميت
ولي طموحٍ مات في تالي شهره
وش على هالخلق لامني ابتليت
يمكن الله كاتبٍ فيها خيره
وكلما عفت الهوى وقلت اكتفيت
لوحت لي بين حجاني مره
