يقول من هو نظم القاف نظام
وإذا بغى بدع المثل يهتوي له
اليوم هذا فارق بين الأيام
واليوم هذا بُرك يوميه وليله
في حكم من هو له مواقيف وجسام
مواقفه تعرف كبار وجليله
فهد إليا عدوا ملوكٍ وحكام
من بينهم يبرز ولا به مثيله
فهد ذخر من حده الوقت وأنظام
مواقفه تشفي النفوس العليلة
هو خادم البيتين بحقوقها قام
اللي ثنا من دون جاره دخيله
سابك ومن فيها يحيون ضرغام
ولي عهد الفهد حمله يشيله
عبدالله اللي للفهد درع وحزام
يا مرحبا مليون لو هي قليلة
عبدالله اللي للمهمات مقدام
يا مرحباً وإعداد ما سال سيله
عبدالله وصحبه عزيزين وحشام
يا مرحبا وإعداد وبل المخيله
زيارتك هاذي لنا أشرف وسام
يا مرحبا يا كاسبين الجميلة
أكرمتنا بزيارتك كل الإكرام
يمناك دايم يابو متعب طويله
أبو المعوق والأرامل والأيتام
يا راعي الجودات راعي الفضيلة
ومثل البحر لا هاج جاله تلطام
اللي يحلحلها بحنكة وحيله
لا جا نهار فيه زوغات وزحام
لا شبت الهيجا برأس الفتيلة
ابن المليك اللي حكم حكم الإسلام
حكم بلاده بالسيوف الصقيله
من اليمن جنوب شمال للشام
وحد بلاده فوق هجنه وخيله
بخالص النيه وبالدين وحسام
ولولا إخلاصه كان ما تستوي له
طير السعد بأرض الجزيرة بها حام
غيره بغاها بس عيَّت تجي له
الدين فيها طبقَّه نص وأحكام
حكم وخلا دين ربه دليله
من عقب ما كنا دويلات وأقسام
اليوم صرنا كل أبونا قبيله
عقب الجهل والجوع في خير وأنعام
عساه يسكن في جنان ظليله
فعله شهر من غير إعلان وإعلام
يرويه جيل بالتواتر لجيله
يستاهل العليا مليك لها شام
قبله بفعل المجد ما نال نيله
مهما كتبنا عنه بتجف الأقلام
في وصف أبو تركي القوافي بخيله
من فترة التأسيس فقنا مائة عام
وبجهودكم فقنا قرون طويله
هاذي الجبيل اليوم تزهى بهندام
تزهى بفن التكنولوجيا المهيله
من عقب ما هي كانت أفكار وأحلام
صارت حقيقة وأول مستحيله
أكبر مجمع للصناعات بأحجام
على أسس قامت مصانع ثقيله
بأفكاركم هالصرح يا سيدي قام
وتخطيطكم هذا وهذا حصيله
وبجهودكم نمشي بها لصرح قدام
من اعتصم بالله فالله وكيله
تظافر المجهود شعب وحكَّام
شعبٍ تفانى للوطن في سبيله
حنا لها من دون طامع وسوام
ولا علينا من نفوس غليله
ما حن بمن يجري ورا طرد الأوهام
حاكي بلا دليل ويش يحكي له
أرجو السموحة وانهي القاف بختام
والهرج دايم صامله في قليله
تمت وصلوا عد ما صايم صام
وإعداد من يكتال واللي يكيله
