طاب لي من دلة السيف بالفنجال كيف
مع رجال بالكرم سابق معروفها
لو سبقت العلم بالحلم ما سريت طيف
والسعادة تنقرأ بالوجيه حروفها
فرحتك يا بنت راكان جاء للكون ضيف
رحبي به والمعازيب رؤوس اضيوفها
ابشري بشرى فرحها مثل شوف الكفيف
ما يجمل فرحة العيد غير اسيوفها
ابرك الحزات واحلا هدايا في العيد سيف
تمت الفرحة وراكان عز اصفوفها
زينة الدنيا وزينة حياة الناس ريف
الأوادم فانيه والسلف مخلوقها
ثالث العشر التوالي من الافراح شيف
من ليال القدر كل يفضل شوفها
الفعايل وزنها له ثقل ما هوب ليف
ثقلها عند النشاما يقص كتوفها
الأسد يحمي عرينه شبل مثله مخيف
هيبته تصبح جميع الوحوش بخوفها
السعد في درب راكان لو انه كليف
انت يا راكان,, مثل العيون وشوفها
تاج رؤس تاجها العز والفعل الشريف
شلوة الكفار عن روق يعرف نوفها
نرضي الزعلان واما رضي يرضيه حيف
لو حدا راسه عن الكيف كان يطوفها
عزوتي بآلاد حافي هل السيف الرهيف
والرماح اللي تخج العدى في جوفها
في زمان فاز فيه الشجاع عن الضعيف
كل قوم تبين فرسانها وضعوفها
لين جاء حكم الشريعة ولا باقي ضعيف
راية التوحيد وآل السعود اتحوفها
دام حكم اخوان نوره من الصدر النظيف
القلوب انظاف والناس حسب ظروفها
يا فهدنا دام عزك وعزك لك حليف
من هجوس مثل نقد الذهب مصروفها
واسعد الايام جمع الوليف مع الوليف
يا رجال لعنبو ممن جحد معروفها
